Noudat ek op 'n roll is, en aangesien Pietie en Nola al elke preek van my tot vervelens toe gehoor het, en in elk geval hulle gatte aan my afgevee het, praat ek nou maar met julle, my gesiglose gemeente van 3 lede. Julle sal agterkom my preke het nie 'n godsdienstige basis nie, dit is dus interkerklik, juis om al my pagan-, heiden- en ateïsvriende ook te akkommodeer. Shalom dus aan julle ook.
Ek wil nou iets roggel oor kinders. Nou nie daai twee gebroedsels van my nie, maar kinders in die algemeen. Seuns EN meisies. Maak nie saak wat hul ouderdomme is nie. Kyk, van kinders bederf kan jy MY nou niks vertel nie. As daai Thabazimbi so koud raak (20 grade) en Pietie is nog op skool, ons praat nou van matriek, dan bring ek mos nou vir hom daai tyd sy coco pops met warm melk kamer toe. Dan is hy nou klaar laat vir skool. Terwyl hy eet, sit ek nou daar by hom. En preek vir hom. Dan maak ek nou sy klere warm oor die olieverwarmer. En hy trek dit so onder die komberse aan. Ek maak tot die das warm. En knoop dit vir hom. En gee sy blink ge-polish-de skoentjies vir hom aan. Dan gaan start ek solank die kar en sit die heater op high terwyl hy sy tandjies borsel, en dan gaan laai ek hom amper binne in die klaskamer af. Smiddae wag ek hom in met 'n Peppermint Aero, 'n russian sausage roll van King Pie, en 'n Coke. Partykeer het hy in die oggende as ek hom aflaai gevra vir 'n Dry Lemon. His wish was my command. En ek het elke oomblik daarvan gelike, en ek sal dit weer doen. So dis nou gladnie waaroor ek wil praat nie. Nie een van ons wil hê ons kinders moet 3 uur in die oggend die koeie gaan melk en dan 6 km kaalvoet in die sneeu skooltoe stap met 'n stuk koue mieliepap vir lunch nie. Asseblief. Maar ek wil jou vra hoe jy jou kinders equip vir hul lewens as volwassenes. Om mans vir hulle vrouens te wees, vrouens vir hulle mans, ouers vir hulle kinders......
En dit gaan ook nie oor geld en of jy geld het of nie. Maar luister nou vandag vir Tannie Hester: as jou seuntjie ge-pamper word en jou dogtertjie word soos 'n Kardashian om gefaff, dan is hulle, en jy, in vir 'n moerse surprise as die realiteit van die lewe hulle die dag tref. So kyk maar vandag na jou seun of jou dogter. En wees eerlik met jouself. Kan jou kinders 'n huis skoonmaak? Of ken hulle net 'n bediende wat dit doen? Weet hulle van Mr Muscle en Handy Andy en hoe om lappies in Jik te lê en hoe om 'n vloer te mop en 'n bed op te maak? En hoe om die wasmasjien te operate? En die stofsuier? Kan hulle stryk? Kan jou kind 'n kar was en skoonmaak van scratch af? Het jy hom dit geleer? Van die emmer na die pyp na die afspoel en die chamois en die koerantpapier vir die ruite en die skuim op die tyres spuit en die cherry cockpit spray heel laaste? Of ken hy net 'n ma of pa wat 'n kar na 'n car wash toe vat? Jy moet hoop hy sal die res van sy lewe geld hê vir dit. Of op 'n plek bly waar daar sulke dienste is. So eintlik ontneem jy hom daai plesier en satisfaksie van self 'n kar te was en dan garage toe te ry en die bande laat pomp en self te voel hoeveel lekkerder ry 'n kar as hy skoon is. Leer hulle hoe om hul eie skoene te polish. Weet jou kinders hoe om die hond te bad? Of sal hulle die res van hulle lewens genoeg geld hê vir 'n hondesalon? En kan hulle kosmaak? Weet hulle mens kan self pizzas in die oond bak? Wag tot daar maatjies kom oorslaap (lees hier eers Nola se oorslaapstorie voordat julle nou sommer links en regs kinders begin oornooi), dan kry jy nou net 'n basiese pizzabasis deeg. Line 'n vlak oondpan met die deeg, (gebruik sommer klaargekoopde deeg man!), deel dit in kwarte. Laat elke kind sy eie kwart "bou". Sny en chop en kerf en rasper als op in bakkies en laat hulle mal gaan. Glo my, daai kinders wat sit en wag voor daai oond se deurtjie is baie meer werd as om eenvoudig 'n take-away te kry. Laat hulle saam met jou cup cakes maak. En hou op sê jy kan nie bak nie! Koop 'n kolwyntjiepan en ready mix cup cakes in 'n boks! Jy gooi net olie en melk en 'n eier by! Laat hulle dit versier. Hulle sal dit vir altyd onthou. Pietie was nie vir een dag van sy lewe in 'n Kleuterskool nie en hy het alles en nog meer geweet as die kinders wat 2 jaar lank daar was. (Obviously het die feit dat ek hom tot in St 9 geborsvoed het, dit prakties onmoontlik gemaak om hom kleuterskool toe te stuur). So ek het baie tyd gehad by die huis, tussen voedings, om hom te leer. Leer hulle hoe om 'n bottel wyn wat 'n kurkprop het, oop te maak. Dalk het een van jou kinders special skills in hierdie verband. So weet ek Pietie kan 'n bottel draught met enige iets oopmaak, hy gee hom net so ligte kappie teen die skerp kant van die bar counter, en siedaar. Nola vang hom sommer so met die binnekant van die voorarm, so dalk verbaas hulle jou nog met hul talente!
Ek het al in totale verstomming na mans gestaar wat by 'n garage uitklim, dan kom wys die petroljoggie vir hom waar sit die lever om die bonnet oop te maak, dan wys hy hom waar sit die dip stick en hoe maak jy die radiator cap oop, en waar moet jy kyk om te sien hoe styf jou bande moet wees. Nee goeie donner, daar's 'n lyn! Leer jou kinders in liefde en geduld hoe om 'n fiets se pap wiel reg te maak. Leer hom hoe om 'n kar se band om te ruil. Leer hulle hoe om gras te sny. Dit is een van die groot vreugdes van die lewe, om na 'n uur se sweet terug te sit en te kyk en te ruik en te luister na die geluid van die spreiers op 'n kortgesnyde grasperk. Leer hulle hoe om vleis te braai. In 'n weber, met hout, en met charcoal. Leer hulle dans. Two-step en wals en sokkie. Leer hulle kar ry. Leer hulle skottelgoed was. Vergeet vir 'n ruk van die tuindienste en die skottelgoedwasser en die car wash en die hondesalon en Debonair's pizza. Laat jou kinders toe om die lewe self te leef en te ervaar en te belewe. Wys hom hoe om 'n swembad te backwash, hoe om 'n muurprop oop te maak en te kyk of daar fout is. Jy ontneem hom van die volle spektrum van menswees as jy alles vir hom doen of dit, teen betaling, laat doen. Jy gaan mos nie sy Lego of sy puzzles vir hom bou nie, hoekom wil jy dan alles doen wat hy of sy as volwassene moet kan doen? As daar enige ervaring is wat hulle kan belewe wat jy hulle nie kan bied nie, laat hulle dit belewe! Span jou vriende en familie in in hierdie verband! Ek het nie vir Pietie geleer jag of bok afslag of voëls ring of foto's neem nie. Ek het ook nie vir Nola geleer wakeboard of hare sny of grimering doen nie. Ja, ons wil hulle teen als beskerm (in my geval wou ek eerder ander mense teen húlle beskerm, maar dis nou besides the point), maar jy doen jou kind nie 'n guns as jy als vir hom doen nie.
En moenie vir my sê jys te moeg of te besig of te arm of te ryk of te dom nie. Dan moes jy nie kinders gehad het nie! So lig jou gat en gaan leer jou kind iets. Onthou een ding: daar is vir jou kind niks lekkerder as om saam met sy ma of pa iets te doen nie, om te voel al die aandag is op hom nie, en om daarby ook nog te voel hy of sy is nou besig met "grootmensgoete" nie! En as jy 'n enkelouer is, of jy's in 'n same-sex verhouding of huwelik, of jou man is eenvoudig te useless of jou vrou te dik en lui, dan is dit ongelukkig nie 'n verskoning nie. Iewers in jou lewe is daar 'n vriend of vriendin, oupa of ouma, niggie of neef, broer of suster, buurman of kollega, wat jou kind IETS kan en wil leer wat jy self nie kan of wil nie. Moenie dat JY as ouer self die grootste struikelblok wees in jou kind se ontwikkeling nie.
Dit geld nie net praktiese goed nie, maar ook goed soos geldsake en ander soortgelyke goed wat hulle eendag moet kan doen. Vat hom saak poskantoor toe, al is dit nou HOE old school. Vertel hom van goed soos belasting en tjeks en tv- lisensies en al die goedjies wat hulle moet weet. My kinders het vroeg-vroeg elkeen hul eie lêer gehad. Later toe hulle uit die huis uit is, toe vat hulle dit saam. Later jare sou ek maar sien hulle liasseer al hulle pay slips en korrespondensie van die gym of die selfoon of die kar se lisensies of what ever hulle hul mee besig gehou het. Maar dis iets wat hulle geleer moes word. Ja ek weet almal doen electronic banking, maar vat jou kind bank toe en verduidelik vir hom van die depositostrokies en hoe jy geld in 'n rekening deponeer of onttrek en hoe jy jou bankkaart gebruik. Vat hulle saam as jy gaan kos koop. Verduidelik hoekom jy sekere goed koop en ander goed nie. Hoe gaan hulle ooit eendag kan beplan of kan begroot of aan die hoof van 'n huishouding staan? Moenie verwag die skool of die kerk moet hulle leer nie. Dis JOU kind. Leer JY hom. Rus hom toe vir die toekoms. Leer hom maniere. Wys dit vir hom. Jy sal met hom 'n band smee wat nooit verbreek kan word nie. Jy sal die sekere wete hê dat jou kind onder enige omstandighede sal kan cope, maak nie saak hoe moeilik nie.
Ek is "by a long shot" nie die perfekte ma nie. Nie eens amper nie. Maar ek kon vir Nola op 14 Italië toe stuur vir 5 jaar en sy't gecope en gefloreer. Of Italië al herstel het, dié weet ek nou nie. Pietie is direk na skool Londen toe vir 'n jaar, waar hy op sy eie gaan oorleef het. Of hy ooit weer toegelaat sal word op enige plek binne die Britse Koninkryk, dié kan ek nou nie met sekerheid sê nie. Maar dat hulle vandag alles vir hulself kan doen, en eintlik baie meer as ek kan doen, dit weet ek wel.
Amen. Kollekte by die deure gaan vandag aan die Abraham Kriel Kinderhuis op Nylstroom en ons sing Lied 325 uit die Liedboek, al 4 die verse.
Sent from my BlackBerry® wireless device
Kon gedink het jy vat weer 'n kans! Ek was kinderlik opgewonde oor die lied wat jy ons laat sing, tot ek dit naslaan en agterkom jy het nie 'n idee dat Lied 315 net twee verse het nie, of dat dit 'n totaal onbekende en onsingbare melodie is. Dêmmit, hou op om met my emosies te speel!
AntwoordVee uit