2014-10-01

Kompetisies

Kom ek vertel julle hoeveel stuff het ek al in kompetisies gewen. Ek skryf in of sms mos vir al wat 'n kompetisie is. Gewoonlik wag ek met die sms'e tot Maggie by die huis is dan misbruik ek haar werkfoon. Kompetisies oor die TV, in tydskrifte, in koerante, op advertensieborde langs die pad, orals. Nes 'n bobbejaan.
Jare gelede het ek in die Sarie 'n jaar se voorraad van herwinbare babadoeke gewen, van geboorte tot 12 maande oud. Ek het dit vir 'n swanger vriendin gegee. Met 'n sms na Kyknet het ek so paar jaar gelede 'n Michèl Herbelin horlosie gewen. Ek het al kontant in al die koerante se Blokraaie gewen. Sondag, Rapport Tydskrif, Beeld en Die Burger. Die blokraaie op 'n saterdag in Beeld en Die Burger kan jy mos instuur vir prysgeld. Ek het die ander dag 'n Woordeboek gewen in Huisgenoot se Foto Blokraai. Ek het hom vir een van my maatjies gegee wat nie kan spel nie. Sy spel darem nou al "vanaand" en nie meer "vannaand" nie. Ek's so bly. Ek het die ander dag met 'n Rooi Rose sms kompetisie 'n R1000 se Pharmachoice produkte gewen. Omtrent 10 bottels van daai Arthrochoice. So ten minste weet ek ek is gedek wat artritis aanbetref. Ook deur Rooi Rose het ek 'n Bosch tuimeldroër en Bosch wasmasjien gewen, plus 'n jaar se skoonmaakprodukte. Ek het dit by Nola en Christiaan laat aflewer vir 'n trougeskenk.
Die ander dag toe hardloop ek 'n fun run hier op Swartklip. Net 3km. Gladnie my afstand nie. Vir my is 3km amper soos 'n sprint. Maar wonder bo wonder hardloop ek omtrent 300 skoolkinders weg en wen 'n R1000 koopbewys van Swartklip Spar. Desembermaand by die see toe is daar 'n 10km strandwedloop van Mosselbaai na Hartenbos, sandlangs. Nou moet jy raai wat jou tyd gaan wees. Maar jy moet dit voor die tyd by jou inskrywing sit, en dan mag jy nou nie 'n selfoon of horlosie saamvat nie. So raai ek maar 60 minute. Ek sleep daar in in 59 minute en 36 sekondes. Toe wen ek 'n R1000 koopbewys van Tekkie Town in George. Lekker tekkies en sokkies gaan koop ekke.
By so buitelug praatjie oor tuinbou het ek 'n massiewe sak vol blommesaad gewen deur net 'n vraag te antwoord. By Ushaka Marine World het ek die kans gewen om te help in die hoofvertoning waar ek met die dolfyne gewerk het! Ek het ook 'n aanlyn opname voltooi vir Discovery Health toe wen ek 'n Levy sonbril van R2000. Dié het ook sy pad gevind na Nola. Ek het natuurlik al baie gelukstrekkings of "lucky draws" gewen by al wat 'n basaar of kermis of damesoggend of padwedloop is. Ek het ook in hierdie jaar met 'n sms kompetisie 4 kaartjies na Madame Zingara se Theatre of Dreams gewen by Monte Casino, ete ingesluit, elke ding! Ek en Maggie en my skoonma en haar vriendin het gegaan. Die ander dag toe eet ons in die Spur in Thabazimbi op Valentine's dag, toe wen ek 'n bottel wyn en 'n sak vol sjokolade.
So paar jaar terug toe ek in die Kaap gebly het, gaan hou ons piekniek op Paarlberg en kyk na die sonsondergang. Vooraf is mense aangesé om in Kersgewaad aan te trek. Toe trek ek 'n groen t-hemp aan met daai rooi kersvader langpunthoede. Toe wen ek 'n bottel wyn en 'n kaas-en-beskuitjie hamper. By verlede jaar se Good Food and Wine Show by die Dome in Johannesburg, toe is daar 'n demonstrasie deur die Kokkedoor deelnemers. Toe vra hulle ook 'n vragie. Toe wen ek 'n hamper van al Spekko rys se verskillende produkte, in so koelsak met Spekko afdroogdoeke ook. Verlede jaar by Skouspel toe wen ek 2 pragtige blikbekers by Virseker. Ook net 'n vraag beantwoord. Ons drink steeds elke liewe oggend koffie uit dit! Toe die volvo laas gediens is, mail die garage 'n aanlyn opname wat jy moet voltooi oor die diens. Net 5 minute gevat, toe wen ons 'n R500 petrolbewys.
Pietie is net so gelukkig. Hy het ingebel na 'n radiostasie in die Kaap toe wen hy kaartjies na Robbie Williams se konsert toe. Hy het ook 'n YDE koopbewys gewen. Op 'n keer het hy deelgeneem aan 'n kompetisie waar jy 'n nuwe naam moes uitdink vir Big Korn Bites se nuwe geur. Toe kom hy op met "shipwrecked coconut", toe wen hy 'n i-pod en 'n boks vol Big Korn Bites. Hy het ook die ander dag hier in Thabazimbi by 'n wynproe geleentheid 'n bottel wyn en sak biltong gewen. Maar hy het die koek gevat met 'n prys van Miller's draught. Jy moes die kode binne in die doppie na 'n nommer toe sms. Toe is hy een van die finaliste. Toe word hy in Seepunt met 'n limo gehaal en hy is na 'n mansion toe daar in Kampsbaai gevat waar al die finaliste ge-wine en ge-dine is. Toe is hy Waterfront toe vir die finale deel van die kompetisie. Daar moes die gehoor stem wie die uiteindelike wenner is. Daar wen hy toe 'n 3-weke "all expenses paid trip" na die VSA via Londen!! Hy is New York toe, Las Vegas, Los Angeles, San Francisco!! In private stralers en hummer limo's! In hotelle gebly, na clubs en casino's toe gegaan, tot elke dag 'n foonkaart gekry om te bel! So ek dink daai enetjie vat die koek!
So wonder julle seker maar hoe is dit moontlik??!! Wat is my geheim?? Daar is nie 'n geheim nie. Ek stel myself bloot oop daarvoor. Ek is die tipe mens wat genot vind in die klein dingetjies in die lewe. As jy gereeld 'n Kauai smoothie drink, vra vir 'n lojaliteitskaartjie. As jy 10 plakkers op het, kry jy 'n gratis medium smoothie van jou keuse! Op maandae kry jy 2 plakkers! Weet julle hoe lekker is dit om daar in te stap en jou vol kaartjie in te gee en uit te stap met 'n yskoue mango bang!?? Dit voel of jy die lotto gewen het man! Ek het nou so kaartjie van Boost, en elke keer as ons Centurion Mall toe gaan, dan drink ek 'n smoothie. Registreer ook vir al wat 'n lojaliteitsprogram is!! Ons het verlede jaar vir Maggie se ma 'n vliegtuigkaartjie gekoop van George af na Jhb met Maggie se e-bucks, net omdat ons altyd by Engen petrol ingooi met haar debietkaart. Ek het ook 'n Pick 'n Pay Smart Shopper kaart. Ek sal heel gereeld die punte laat omsit in kontant by daai atm masjien daar voor in die winkel. So een maal in 3 maande stap ek daar in en koop vir my 'n Lindt dark chilli chocolate met my gratis punte. Dit voel soos jou verjaarsdag! As ek so ronddwaal by enige fees of skou of expo dan hou ek my ogies oop vir enige kompetisie. Ek maak al daai brosjures bymekaar en vul dit in. As iemand my byloop om 'n opname in te vul, en ek het die tyd, doen ek dit met graagte. Ek het 'n boksie in die kombuis vir my koeverte en skêr en posseëls, so ek knip als uit die koerante en tydskrifte uit en stuur dit weg. As ek 'n tydskrif klaar gelees het, blaai ek na die inhoudsopgawe en kyk na "Kompetisies" of "Wen" en sms na alles toe! So dis seker maar 'n ingesteldheid. Ek verkies om in groot afwagting en geloof in die goeie my lewe te leef, altyd reg vir 'n verrassing of 'n prys of 'n freebie!

Nola het ook al baie goed gewen. Toe ek haar nou bel en vra in watter kompetisies het sy nou al die goed gewen soos koopbewyse en gratis etes en gimsessies en fliekkaartjies en front row seats en backstage passes en naweke en hotelverblyf en spa behandelings, toe sê sy sy't in haar lewe nog nooit 'n kompetisie gewen nie. Ek is toe nou heel verward. Daai was alles met charm en met mense se koppe smokkel, sê sy toe. Goed dan. Dis seker ook 'n manier.
Sent from my BlackBerry® wireless device




Geen opmerkings nie:

Plaas 'n opmerking